الناس دى بتستهبل والله

الناس اللى عملت برنامج wine بيستهبلوا بجد

واللى ميعرفش برنامج wine فهو برنامج من الاخر بيخليك تشغل برامج الويندوز على اللينكس

البرنامج  ده هتلاقي فى الموقع بتاعه نسخ لكل توزيعات اللينكس  واليونكس والكلام ده طبيعى لكن اللى مش طبيعى انهم عاملين اصدارة تشتغل على الويندوز

الكلام ده حاجة من الاتنين استهبال او وقت فراغ

يعنى واحد مشغل ويندوز ايه اللى يخليه يحتاج برنامج يشغل برامج الويندوز

ولو مش مصدق خش على الصفحة دى

أضافات جامدة للفاير فوكس

انتشر الفاير فوكس فى الفترة الاخيرة انتشار كبير  وده طبعا لانه

1. احسن من البدائل التانية

2. مفتوح المصدر

3. بيشتغل على اغلب الانظمة(قريبا على اجهزة الموبيل)
   

4. و اهم حاجة ليه اضافات

حتكلم النهاردة على احسن الاضافات دى … اللى حاططهم على جهازى

نبدأ مع الاضافات وانا مش مرتبهم بترتيب معين

• Stumble Upon

ودى من الاضافات المفضلة عندى ولازم اركبها فى اى جهاز اقعد عليه

الاضافة دى باختصار حتساعدك انك تكتشف مواقع جديدة ومواضيع جامدة

ازاى؟

بعد التصطيب هيطلب منك تسجل (متقلقش مفيش spam)

ولو برضه لسة قلقان من ال spam ممكن تنفذ الطريقة دى

المهم هيطلب منك اهتماماتك يعنى ايه الحاجات اللى بتحبها

علم على اللى ان عاوزه وسيف

وبعد كده دوس على زرار StumbleUpon فى الToolBar

وكل ما تدوس هيجبلك موقع جديد او موضوع جديد

ملحوظة: الاضافة دى بتديلك شعور زى الشعور اللى حسيته اول ما ركبت ADSL

• Web Developer

الجواب بيبان من عنوانه لو انت مصمم بتحب تفهم الموقع ده اتعمل ازاى انصحك بالاضافة دى

الاضافة دى هتفيدك جدا مش هتكلم عنها كتير هسيبك تستكشفها بنفسك وصدقنى مش هتندم

• Stylish

لو مليت من شكل صفحات المواقع اللى بتخش عليها فى الاضافة دى فيها الشفا بتخليك تغير الاستايل بتاع اى موقع على راحتك ممكن تغير الالوان والبوزيشن بتاع الحاجات كلها باستخدام اكواد css او ممكن تجيب اكواد جاهزة بتغير الشكل من الموقع ده UserStyles يعنى مثلا انا عامل ال FaceBook بالاستايل بتاع DeviantArt والموقع ده هيفيدك قوى فى تعلم التصميم  ومخلى الاستايل بتاع Digg ستايل اسود ومغير yahoo و Google و gmail بالوان غامقة شوية

يعنى من الاخر الصفحة اللى متعجبكش متقولش للمصمم انها وحشة غيرها انت بنفسك

• ِ
  

  AdBlockPlus

كل ما تخش موقع تلاقيه ملغم اعلانات والاعلانات دى بتاخد وقت فى التحميل اكتر من الصفحة كلها

ريح الجمجمة الاضافة دى هتمنع كل الاعلانات المملة اللى فى المواقع دى حتى الاعلانات اللى فى موقعى

• FlashBlock

من اسمه هو بيمنع الفلاشات انها تشتغل وبيحط مكانها علامة تدوس عليها لو عاوز تشغل الفلاشة لان الفلاشات دى اكتر حاجة بتاخد وقت فى التحميل

• FireFtp

ده حيخليك تنقل الملفات ب Ftp وده مفيد جدا هو يمكن مفهوش امكانيات ال FileZilla

بس خفيف وحجمة صغير وحيعملك كل اللى ممكن تحاتجة

يمكن عيبه انه مش شغال على FireFox 3 وده خلانى اضطر اشيلة

لانى مركب الاصدارة firefox3-beta5 ومش بستخدم 2

فوتو شوب + يوبونتو

بسم الله الرحمن الرحيم

اكتر حاجة كانت بتخلى مستخدمى اللينكس يسيبوا نسخة من الويندوز عندهم هو البرنامج ده

رغم ان فيه ليه بديل فى اللينكس اسمه The Gimp بس الشكل وطريقة تنفيذ الحاجات مختلفة عن الفوتو شوب

وفى الغالب المصممين مش بيحبوا التغير بالنسبة ليهم تغير البرنامج اللى اتعودوا عليه يعتبر مستحيل (رغم ان مفيش حاجة اسمها مستحيل بعد خبر موبينيل)

المهم هما عاوزين الفوتو شوب يشتغل على اللينكس عشان يقدروا يستخدموه

بس كده نشغلهم الفوتو شوب بسيطة

الشرح ده حيكون على توزيعة يبونتو بس ممكن يتعمل فى اى توزيعة تانىة مع اختلافات بسيطة

نبدأ

اول حاجة عشان تشغل اى برنامج من برامج الويندوز محتاج برنامج wine وطريقة تصطيبه سهله جدا ومش هتحتاج انك تدور عليه او تعمله دونلود الموضوع سهل كل اللى عليك انك من قايمه Application تختار Add/Remove

وبعد كده

هتظهرلك الشاشة دى

1. لازم تخلى الخانه دى All Open Source Application أو All Application

2. تكتب هنا اسم البرنامج اللى انت عاوزه (wine)

وبعد كده تعلم جنب البرنامج اللى أنت عاوزه وتدوس Apply Changes

وكده ممكن تصطب الفوتو شوب من الملف بتاعه

ملحوظة

لو حسيت ان الكلام ملخبط او بيظهر شكله وحش يبقى انت محتاج خطوط ابحث فى جوجل عن tahoma filetype:ttf

او حمل مجموعة الخطوط دى

وفك ضغط الملف فى فولدر

/home/yourusername/.wine/drive_c/windows/fonts

لو عاوزه يظهر

View -> Show Hidden File