الناس دى بتستهبل والله

الناس اللى عملت برنامج wine بيستهبلوا بجد

واللى ميعرفش برنامج wine فهو برنامج من الاخر بيخليك تشغل برامج الويندوز على اللينكس

البرنامج  ده هتلاقي فى الموقع بتاعه نسخ لكل توزيعات اللينكس  واليونكس والكلام ده طبيعى لكن اللى مش طبيعى انهم عاملين اصدارة تشتغل على الويندوز

الكلام ده حاجة من الاتنين استهبال او وقت فراغ

يعنى واحد مشغل ويندوز ايه اللى يخليه يحتاج برنامج يشغل برامج الويندوز

ولو مش مصدق خش على الصفحة دى

يا ريت اللى ميعرفش حاجة ميتكلمش عنها

النت مليان ناس بتكتب فى حاجات متعرفهاش وفى الغالب كلامهم بيبقى غلط وفى ناس كتير بتصدقه والموضوع ده بيحصل فى كل انواع المواضيع اللى على النت

وناخد مثال الناس اللى بتتكلم عن اللينوكس

وانا دلوقتى بتكلم عن الناس اللى مجربوش اللينكس ولا حتى قروا عنه اى حاجة ومع ذلك بيحسوا انهم لازم يتكلموا

مصطلحات لينوكساوية

فى الموضوع ده شوية مصطلحات من اللى بيسمعها مستخدم اللينكس او مستخدم الكمبيوتر عامة

Cron

هو زى منظم مواعيد للبرامج بيحدد معاد لكل برنامج عشان يشتغل فيه يعنى مثلا انا عاوز برنامج Amarok كل يوم الساعة 7 الصبح فاول ما تيجى الساعة 7 البرنامج يتفتح

Daemon

لا مش اللى جه فى دماغك لو انت من الناس اللى بتتابع افلام الرعب .ال Deamon ده اى برنامج بيشتغل لوحده من غير اى تدخل منك .ممكن يكون مثلا برنامج بيمسح الملفات المؤقته

ملحوظة ال Cron عباره عن Deamon.

Hacker

بسبب الافلام الناس فاكره ان الهاكر هو اللى بيخترق اجهزة الناس التانية الكلام ده مش صحيح اللى بيعمل كده هو ال Cracker. الهاكر تقدر تقول عليه مبرمج محترف والهاكر هو المستوى اللى بيسعى ليه اى مبرمج. وال Cracker برضه يعتبر هاكر لكنه انضم للجانب المظلم.

Kernel

الكرنل هو البرنامج الرئيسى لاى نظام تشغيل .الكرنل هو اللى البرنامج اللى بيتعامل بشكل مباشر مع الهارد وير.

البرامج التانية بتطلب من الكرنل انها تنفذ حاجات فى الكمبيوتر عشان تقدر تنفذها .يعنى مثلا لو برنامج عاوز يكتب حرف على الشاشة البرنامج بيطلب من الكرنل انه يحط الحرف ده على الشاشة يعنى من الاخر كل حاجة بتعدى على الكرنل الاول(بس طبعا لكل قاعدة استثنائات). يعنى الكرنل ده زى الحكومة بتاعت نظام التشغيل.

compiler

هو البرنامج اللى بيحول السورس كود المكتوب بلغة بفهمها الانسان لملفات تنفيذية مكتوبة بلغة يفهمها الكمبيوتر

Open Source

ببساطة هو البرنامج اللى بيجى معاه السورس كود بتاعه عشان تستخدمه وتتعلم منه وتعدله لو حبيت.

process

اى برنامج بيشتغل على الكمبيوتر يعتبر Process.

pid

كل process بيبقى ليها id مختلف عشان ممكن ال process تتشابه.

signal

دى الطريقة اللى البرامج بتكلم بعضها بيها.

لو عجبك الموضوع ده يبقى اكيد هيعجبك ده

وانتظروا قريبا

مصطلحات انترنتية الجزء التانى

يوبونتو رايح جاى

خلاص بعد 15 يوم بعد عن اليوبونتو واستخدام جينتوو رجعت لليوبونتو تانى وحشنى اللون البنى وكم  البرامج الجاهزة  و ان المشاكل اللى بتواجهك مجرد بحث فى جوجل 99% بتلاقى الحل

هو طبعا انا اتعلمت حاجات كتيرة فى الجينتوو كان لا يمكن اتعلمها مع يوبونتو او فيدورا بس بعد مظبتوا زى منا عاوز مبقاش فى اى حاجة اعملها

فعلا  اللى يشرب من سهولة يوبونتو لازم يرجعله تانى

والحمد لله خلصت الامتحانات على خير “من النهاردة مفيش امتحانات انا الامتحانات انا الامتحانات“

يعنى تقريبا بقيت شبه متفرغ للموقع لغاية يوم 24 الشهر ده على الاقل

مع السلامة يوبونتو

بعد فترة خمس شهور من استخدام يوبونتو لقيت نفسى زهقت فقررت انى اغير واستخدم توزيعه تانية

فقررت انى استخدم slackware لانى جربت توزيعة slax المبنية عليه وعجبتنى انها سريعة جدا رغم انها لايف سى دى المهم بدأت اقرا عن ال slackware عشان ما البسش بعد ما اركبه ويطلع زباله

وأول حاجة دورت فيها طبعاwikipediad وبعد كده على عمنا جوجل لغاية ما لقيت الموضوع ده Gentoo vs Slackware قررت انا اصطب Gentoo ,وغيرت البحث من slackware الىGentoo

وكل المواضيع اللى اقراها عنه الاقى (صعب -للمحترفين- ابعد عنه-ده انت بتعمل كل حاجة من السورس-ده انته هتعمل كومبيل للكرنل)

بس قولت فى نفسى

زى ما الناس دول قدروا يعملوا نفس طعم الكوكا من غير نقطة سكر انا هقدر اصطب جينتوو

والحمد لله بعد 6 ايام واربع ساعات من المحاولات احب اقولكم انى بتكلم دلوقتى من توزيعة Gentoo و واجهة KDE

وعلى فكره الموضوع مش صعب زى ما بيقولوا هو الفرق بينه وبين الديبيان انك لما تواجهك مشكلة هتتعب شوية عشان تحلها

وهتلاحظ فرق سرعة كبير بين Ubuntu و Gentoo وكمان بيديلك تحكم اكبر بكتير

لو عايز تجربه الموقع الوحيد اللى ممكن انصحك بيه Gentoo Wiki

الموقع ده هتلاقى فيه اى حاجة ممكن تحتاجها عن Gentoo

صطب اى برنامج بالضغط على رابط(يوبونتو)

خيل وانت بتقرا لسته فيها  برامج لليوبنتو . وواحد منهم عجبك ساعتها حتعمل ايه. بدل ما تفتح Add/Reomove او تفتح ال Terminal عشان تصطب البرنامج ده, بمنتهى البساطه تدوس على رابط. يظهرلك رساله بتسألك ان كنت عاوز تصطب البرنامج, وبعد كده يطلب منك الباسورد. قبل حتى ما تكون دورت على البرنامج فى ال Add/Remove يكون البرنامج اتصطب

لازم الأول تصطب Apturl. عشان تصطبه, افتح الترمنال (Application>Accessories>Terminal) وأكتب الامر ده:

sudo apt-get install apturl

بعد التصطيب لازم تعمل ريستارت للمتصفح بتاعك. دلوقتى لو عاوز تجرب Apturl هتحتاج رابط صح وادى رابط

Install

والرابط ده حيسطب برنامج Gnome-Main-Menu

الحمد لله أشتغل بس قبل ما اى حد يقول انه  مش امان انى استخدمه احب اطمنك لان كل اللى البرنامج ده بيعمله انه يكتب الامر apt-get install بالنيابه عنك يعنى بدل ما تفتح الترمنال وتكتب الامر واسم البرنامج الحاجات دى هتتعمل بمجرد الضغط على لينك يعنى مينفعش  تصطب غير البرامج اللى فى ال repo. بتاعتك

طب لو عاوز تعمل الحكايه ده فى موضوع انت كاتبه اوفى موقعك

بسيطه اعمل لينك وحط فى الرابط بتاعه apt: وبعد كده اسم البرنامج

مثلا:

apt:gnome-main-menu

فوتو شوب + يوبونتو

بسم الله الرحمن الرحيم

اكتر حاجة كانت بتخلى مستخدمى اللينكس يسيبوا نسخة من الويندوز عندهم هو البرنامج ده

رغم ان فيه ليه بديل فى اللينكس اسمه The Gimp بس الشكل وطريقة تنفيذ الحاجات مختلفة عن الفوتو شوب

وفى الغالب المصممين مش بيحبوا التغير بالنسبة ليهم تغير البرنامج اللى اتعودوا عليه يعتبر مستحيل (رغم ان مفيش حاجة اسمها مستحيل بعد خبر موبينيل)

المهم هما عاوزين الفوتو شوب يشتغل على اللينكس عشان يقدروا يستخدموه

بس كده نشغلهم الفوتو شوب بسيطة

الشرح ده حيكون على توزيعة يبونتو بس ممكن يتعمل فى اى توزيعة تانىة مع اختلافات بسيطة

نبدأ

اول حاجة عشان تشغل اى برنامج من برامج الويندوز محتاج برنامج wine وطريقة تصطيبه سهله جدا ومش هتحتاج انك تدور عليه او تعمله دونلود الموضوع سهل كل اللى عليك انك من قايمه Application تختار Add/Remove

وبعد كده

هتظهرلك الشاشة دى

1. لازم تخلى الخانه دى All Open Source Application أو All Application

2. تكتب هنا اسم البرنامج اللى انت عاوزه (wine)

وبعد كده تعلم جنب البرنامج اللى أنت عاوزه وتدوس Apply Changes

وكده ممكن تصطب الفوتو شوب من الملف بتاعه

ملحوظة

لو حسيت ان الكلام ملخبط او بيظهر شكله وحش يبقى انت محتاج خطوط ابحث فى جوجل عن tahoma filetype:ttf

او حمل مجموعة الخطوط دى

وفك ضغط الملف فى فولدر

/home/yourusername/.wine/drive_c/windows/fonts

لو عاوزه يظهر

View -> Show Hidden File

ازاى تقدر تشغل الفايروسات فى اللينكس

بجد حاجة ممله ان مستخدمى الويندوز عندهم كل الفايروسات. بجد مش المفروض الناس اللى بتستخدم اللينكس يستمتعوا بالموضوع ده هما كمان

بفضل الناس اللى عمله برنامج Wine دلوقتى مستخدمى اللينكس فى كل مكان يقدروا أخيرا يشغلوا الفايروسات (تقريبا…) .

المشكلة ان اللينكس مش من السهل انك تشغل عليه الفيروس زى الويندوز.لازم تدور على الفايروسات وتشغلها بنفسك يعنى مش بتشتغل لوحدها زى الويندوز .

لازم المطورين بتوع اللينكس يركزوا على الموضوع ده. لان لازم تشغيل الفايروسات يبقى اسهل من كده.

انا اعرف ناس بتجمع الفايروسات بس ما حبتش ازعجهم ,لقيت حبة مش بطالين بعد البحث فى رسايل السبام اللى بتجيلى.جبت نسخة من برنامجClamAV, قدرت اجمع نص دستة فايروسات “مش بتشتغل غير فى الويندوز” بس موضوع مش بتشتغل ده قرب يتغير

Klez

بعد شوية مجهود Klez اشتغل , بس Wine فضل يطلع رسايل ايرور عن ملف “ntdll.” دورت فى جوجل عشان اعرف الفايرس ده بيعمل ايه بالظبت , اكتشفت انه بيدور فى السيستم بتاعك جوه ملفات التكست, ولو لقى اى ميل يبعت نفسه للميل ده قلت لازم اجرب فحطيت الميل بتاعى فى ملف .txt فى الفولدر

  ~/.wine/fake_windows/Windows/Desktop/

واستنيت عشر دقايق بس مفيش اى حاجة جت قلت اروح ابص فى كتاب الفيزيا شوية و أراجع على chapter2 لان الامتحان بكره

المهم فات نص ساعة ومفيش اى حاجة قلت جايز فى مشكله فى ارسال البيانات فى برنامج wine فنزلت نسخة من برنامج putty وأشتغل عادى

بيتهيقلى Klez يستحق 2/5هو يمكن معملش اللى المفروض يعمله بس على الاقل اشتغل

MyDoom

الفايرس ده مشتغلش اساسا فتقيمه 0/5

Sobig

الورم دى اشتغلت . المفروض انها بتعمل ملف اسمه winstt32.dat وبعد عمل بحث عن الملف ده فى فولدر fake_windowsملقتش الملف ده وبرضه مبعتش نفسه على الميل

التقيم 2/5

SCO worm

الفايرس ده المفروض انه تعديل على My Doom

المره دى مشتغلش بس لا ده كمان حط الملف اللى كان المفروض يحطه فى الفولدر

 ~/.wine/fake_windows/Windows/System/shimgapi.dll

بس للاسف معملش اى حاجة تانية وقفل”تقريبا الواحد لازم يبقى عنده ويندوز عشان يستعمل الحاجات الممتعة دى

بيتهيقلى ان اللى عدل MyDoom بالشكل ده كان حاطط فى دماغة انه يخليه متوافق مع اللينكس

التقيم 3/5 على الأقل أشتغل

SomeFool

الفايروس ده قدر انه يحط الملف winlogon.exe فى الفولدر بتاع wine وغير كده علق فى infinte loop خلت الجهاز بطئ جدا طبعا اول ما دوست ctrl+c اتقفل بس على الاقل عملنص اللى كان المفروض يعمله

التقيم:4/5

استنتاج

من الخمس فيروسات اللى جربتهم ولا واحد قدر يبعت نفسه او ينسخ نفسه.

الواحد لازم ينحنى لفايروس SomeFool لانه قدر يبطئبس لو ده الضرر الوحيد من تشغيل فايروسات الويندوز فى wine يبقى من الواضح ان مطوروا wine لازم يعملوا مجهود اكبر عشان يخلوا الحاجات دى تشتغل عندنا احنا كمان

	Klez	MyDoom	Sobig	SCO	SomeFool
اشتغل اساسا	شغال	مش شغال	شغال	شغال	شغال
حط ملفاته	مش شغال	مش شغال	مش شغال	شغال	شغال
نسخ نفسه	مش شغال	مش شغال	مش شغال	مش شغال	مش شغال
اثر على النظام	مش شغال	مش شغال	مش شغال	مش شغال	شغال
التقيم	2/5	0/5	2/5	3/5	4

ملاحيظ

• عشان اقدر أشغل الفايروسات دى فى برنامج wine اضطريت انى اعدل فى ملفات الكونفج بتاعته يعنى انت فى أمان متقلقش
• لو حبيت تجرب وشغلت فايرس بس بطئلك الجهاز او عمل اى حاجة كل اللى حتحتاج انك تعمله انك تدوس ctrl+c عشان تقفل wine تمسح الفولدر بتاعه fake_windows
• لو مكسل تمسح الفولدر او مش لاقيه (اصله مخفى) امسحwine وصطبه تانى فى 5 دقايق بالظبط
• بسبب نظام الصلاحيات فى نظام اللينكس الفايروس مش هيقدر يتحكم فى جهازك الفايروس مش هيقدر يشوف اى حاجة غير ملف الهوم بتاعك
• لو مش عاوزه يشوف ملف الهوم بتاعك اعمل ل wine يوزر خاص بحيث لو اشتغل مش هيعمل اى حاجة وهيستناك تقفله
  
• فى اللينكس الفايروسات متقدرش تخلى نفسها تبدأ مع نظام التشغيل على عكس الويندوز

وزى ما قولت قبل كده لازم مطوروا برنامج wine يشتغلوا احسن من كده عشان يدعموا الفايروسات دى لان احنا كده معنداش دعم فايروسات وصحابى بيغيظونى بالموضوع ده (احنا جهزنا بيشغل فايروسات وانت لأ)

سلام بقى عشان الحق الامتحان

اللينكس للجميع

• ايه اللينكس ده

اللينكس ده نظام تشغيل

• يعنى ايه نظام تشغيل؟

بص ببساطة حاجة زى الويندوز

طب مانا عندى الويندوز استعمل اللينكس ليه؟

هقولك يا سيدى

1. مفتوح
2. بلوشى
3. ليه تستخدم برامج مش مرخصه لو ممكن تاخدها ببلا
4. انسى الفايروسات
5. مش هتضر تصطبه كل اسبوعين
6. السرعة مش بتتناسب عكسيا مع الزمن
7. ااوعى تنسف حمامك القديم
8. لو عندك play station3 ما تصطب عليه لينكس
9. اتحكم فى كل حاجة
10. سهل لو عاوزه يبقى سهل
11. بقية الحاجات فى يوم تانى عشان عاوز انام

1-مفتوح

• ايه مفتوح ده انت بتعمل دعايه لموقعك ولا ايه؟

انا قصدى بمفتوح انه مفتوح المصدر وده برضه سبب تسمية الموقع المهم معنى كلمه مفتوح المصدر انك ممكن تبص فى الكود بتاعه وتتعلم منه وتعدل عليه وتطوره ومحدش حيكلمك فى انظمة تانية حتى لو اشترتها مجرد محاوله انك تغير فيها حاجة ضد القانون ولو مش مصدقنى اقرا اتفاقية المستخدم
يعنى من الاخر حرية

2-بلوشى

• ماشى انت بتقول انه مجانى يعنى انت بتشوف حد فى مصر بيدفع تمن حاجة؟

اه انا معاك انك ممكن تجيب اسطوانه ويندوز من على الناصية بخمسة جنيه بس دى تعتبر نسخة مسروقة لو حتقبلها على نفسك انا مقبلهاش
وكمان لو اتقفشت بيها حتتظبت وانتوا عارفين التظبيت فى البلد دى عامل ازاى

3-ليه تستخدم حاجات مش مرخصة(مسروقة) لو ممكن تاخدها ببلاش ومتبقاش مسروقة

• قصدك ايه؟

عارف البرامج الى انت بتجيبها مسروقة دى فى برامج مجانيه بتقوم بنفس الوظيفة تقريبا وساعات بتقوم بيها احسن والدليل على كده برنامج firefox

• يعنى الناس دى بتكسب منين ؟

متقلقش انت عليهم هما بيشتغلوا بس هو انت لازم تدخل الفلوس فى كل حاجة يا عم بيشتغلوا متطوعين

• يعنى انت هتقارن واحد متطوع بواحد بيقبد 5000 جنيه ؟

اه عشان تبقى عارف الواحد بيطلع احسن حاجة عنده لما يكون بيعمل الحاجة دى عشان عاوز يعملها مش عشان يقبض منها قرشين
اوعى تقولى ان الانترنت اكسبلورر و الناس اللى عامله بتقبض فلوس كتير احسن من الفاير فوكس اللى مبنى على جهد تطوعى
ملحوظة
اينشتاين كان متطوع

3-انسى الفايروسات

بص يا سيدى عدد الفايروسات اللى فى نظام اللينكس قليل جدا واكبر حاجة ممكن يعملوها انهم يبطئوا الجهاز ومجرد ما ترستر الجهاز يبقى الفايروس راح لان النظام شغال بنظام التصاريح

وغير كده امن من الاختراق عن انظمة ميكروزفت

بس انا بتكلم عن جهازك انت يعنى الجهاز اللى عندك فى البيت

السيرفرات دى موال تانى وخصوصا لو انت على استضافة مشتركه

فى حاجات لازم تعملها للتأمين لان بيبقى عليهالحاجات دى معروضة للناس كلها على الويب عن طريق سيرفر الاباتشاى بيبقى ليه يوزر ليه تصريح دخول فى كل حته فلو واحد من العملا قدر يوصل لليوز ده ممكن يخش على النظام كله ويعمل اللى هو عاوزه

ومن الواضح ان صاحب السيرفر اللى انا مستضيف الموقع ده عليه ميعرفش اى حاجة عن الحماية لانه اساسا عامل الاباتشى من غير يوزر واى حد ممكن يخش على ملفات كل الناس وغباء بعيد عنك

ممكن اى حد من العملاء بتوع الراجل ده يوقعله السيرفر فى 5 دقايق

دلوقتى اى حد ما يعرفش اى حاجة فى اى حتة بيشترى فى بى اس ويبيع استضافات

بس الشهر اللى دفعته ده يعدى على خير وانا احول على شركة تانية على طول او اشترى فى بى اس واآمنه بنفسى

4-مش هتضر تصطبه كل اسبوعين

بسبب نفس الاسباب اللى فوق
يمكن يكون السبب الوحيد اللى يخليك تصطبه انك تكون بتحب تجرب انظمة تشغيل جديده
انا فى الفترة اللى فاتت جربت 17 توزيعة لينكس و 3 بى اس دى و osx و solaris
واستقريت اخيرا على يويونتو لينكس (حتجنن بقالى 5 شهور مجربتش حاجة جديدة)

5-السرعة مش بتتناسب عكسيا مع الزمن

فى الويندوز كل ما تفتح جهازك اكتر كل ما يبقى ابطأ لكن فى اللينكس النظام مش كده وانا حتكلم ان شاء الله عن الموضوع ده بالتفصيل فى موضوع منفصل

6- اوعى تنسف حمامك القديم

عندك جهاز قديم شوية هات نسخة لينكس خفيفة وخليه يرجع يعيش تانى
لكن لو الجهاز من ايام الجنيه الخشب ممكن تصطب عليه لينكس من غير واجهة رسومية وتحوله راوتر او فاير وال

7-لو عندك play station3 ما تصطب عليه لينكس

ايوه انتى سمعتنى صح صطبه على بلاى ستاشن ثرى عادى هو انا مش قولتلك انه بيتصطب على كل حاجة

• طب ليه هو انا جهازى وحش

قارن جهازك بالبلاى ستاشن ثرى

كفايه البروسيسور بتاعه
بروسيسور البلاى ستاشن 3 بمقام 8 بروسيسور
و 3.2GHz
ملحوظة بس هو بيتعرف على الهارد وير بتاع البلاى ستاشن كله حتى الجوى ستيك ال 6-axis وقارى اسطوانات البلو راى
وفى ناس بتقلك مش بيتعرف على حاجة

8-اتحكم فى كل حاجة

اللينكس بيديك تحكم فى كل حاجة ومش فى الشكل بس
رغم ان موضوع الشكل ده فيه مرونه كبيره جدا لكن ده ميمنعش ان المرونه دى فى كل حاجة
لان مفيش حاجة المستخدم المتقدم ما يقدرش يفيرها القضية كلها انه يعرف يغيرها منين
والباقى كله بيبقى تعديل فى ملف نصى

9-سهل لو عاوزه يبقى سهل

الموضوع مش موضوع سهولة وصعوبه الموضوع موضوع تعود يعنى لو فى حد اول مره يستخدم الكمبيوتر استخدم لينكس وفض يستخدمه فتره وبعد كده اديتله جهاز ويندوز هيقولك ده صعب قوى
والعكس صحيح

تانى حاجة الموضوع موضوع نفسى
يعنى لو حاجة سهلة وانت حاسس انها صعبة حتبقى صعبة جدا
ولو حاجة صعبة بس انت حاسس انها سهلة حتبقى سهلة جدا
والدليل فى الموضوع ده فى الدراسة يعنى مثلا انا
فى سنه اولى كنت بعتبر الميكانيكا سهلة جدا رغم ان صحابى كانو بيعتبروها صعبة فبالتالى هى سهلة بالنسبة لى
وكنت بعتبر الكيميا صعبة رغم ان كل صحابى كانو بيقولوا انها سهلة فبالتالى بقت صعبة بالنسبة لي
عشان كده حاول انك ما تحكمش ان الحاجة صعبة قبل ما تجربها لانك مجرد انك حطيت فى دماغك انها صعبة بقت صعبة

على العموم انا وظيفتى هنا انى اوريك انه سهل
فى المواضيع الجايه ان شاء الله

10-بقية الحاجات فى يوم تانى عشان عاوز انام

الجواب باين من عنوانه انا عاوز انام عشان فصلت خلاص
ومش قادر افكر