يا ريت اللى ميعرفش حاجة ميتكلمش عنها

النت مليان ناس بتكتب فى حاجات متعرفهاش وفى الغالب كلامهم بيبقى غلط وفى ناس كتير بتصدقه والموضوع ده بيحصل فى كل انواع المواضيع اللى على النت

وناخد مثال الناس اللى بتتكلم عن اللينوكس

وانا دلوقتى بتكلم عن الناس اللى مجربوش اللينكس ولا حتى قروا عنه اى حاجة ومع ذلك بيحسوا انهم لازم يتكلموا

يعنى مثلا الناس اللى تقولك
مبيدعمش عربى
ان كان ينفع تخلى الواجهة كلها عربى
وكمان وانت بتصطبه يقولك على الحاجات بالعربى مش هيدعم الكتابة بالعربى

دعمه ضعيف للهارد وير

هقولك على قصة بسيطة
من شهرين تقريبا اشتريت لابتوب lenovo 3000 n200
من غير نظام تشغيل (كده ارخص)
وصطبت عليه اليوبونتو 8.04 اتعرف على كل حاجة فى الاب توب ما عدا حاجتين
كارت الصوت وبحث بسيط فى جوجل عرفت الحل وحليته فى 5 دقايق

واحد قريبى عجبه اللاب توب نزلت معاه وقالى اصطبله عليه اكس بى
المهم اصط الاكس بى يقولى مفيش هارد متركب(عادى روحت البيوس وعدلت الموضوع)
بس صطبت الاكس بى وكانت المفاجاة
1-مفيش صوت
2-مفيش بلوتوث

3-مفيش انترنت (كارت النتورك محتاج تعريف)

4-مفيش بصمة الصباع

واكيد اللى عنده اللاب توب ده وحاول يصطب اكس بى عارف

عشان بس الناس تسكت

ولا الراجل اللى كان بيقولك
اللينكس لغة برمجة واحدة لكن الويندوز اكتر من لغة برمجة زى (c,c+,c++,c#,visual basic,asp)

اول هام مفيش حاجة اسمها c+ عشان نبقى فى الصورة بس
تانى حاجة يعنى ايه اللينكس لغة برمجة اللينكس ده نواه ولا انت قصدك دعم لغات البرمجة
اه ان كان كده احب اقولك ان لغات البرمجة فى اللينكس اكتر بكتير من اللغات دى مع العلم ان اللغات دى موجوده اساسا
حتى ال asp فى طرق عشان تشغلها ده لو اعتبرناها لغة برمجة

وواحد تانى كان بيقول

العمل على نواه اللينكس توقف اخر اصدارة من كرنل اللينكس كانت من سنتين

ان كنت فى الشهر اللى فات بس مجربت 3 انوية لينوكس مختلفة ازاى العمل عليها وقف

الشركات اللى بتستخدم فى اجهزتها اللينكس بتستخدمها عشان متقدرش تتحمل تكاليف الويندوز مش عشان اللينكس احسن

ده على اساس ان جوجل مش لاقية تاكل

جوجل بتستخدمه بس عشان منافسة لمايكروسوفت

ووكالة الامن القومى الامريكية والناسا والشرطة الفرنسية وغيرهم برضه منافسين لمايكروزفت

ولا اللى بيقول

اللينكس اكثر استقرارا عشان مش مشهور زى الويندوز
لا ضحكتنى اللينكس مشهور اكتر من الويندوز فى السيرفرات
عدد سيرفرات apache اكتر بكتير من سيرفرات micro$oft iis ومع ذلك معظم الهجومات بتكون على سيرفرات iis مش سيرفرات apache وده معناه ان الموضوع مش موضوع شهرة ولا حاجة

واكتر حاجة ضحكتنى الراجل اللى كتب مقال فى amazon.com عن اليوبونتو  ووصفه انه اسوأ لعبة جربها فى حياته

نظام التشغيل بقى لعبة على اخر الزمن والمصيبة ان ان فى ناس كتير رشحوا التقرير ده انه اكتر تقرير فادهم

وواحد بيقول ان المدرس بتاعه قاله على امر يقدر يخترق بيه اى نظام لينكس ولما قولناله يكتب الامر ده قال اصلى نسيته

وفى حاجات كتير من دى بشوفها كل يوم

يا ريت الناس دى تبطل تفتى لان فى ناس كتير بيصدقوا الكلام ده وبيبنوا قرارات على اساسه

والناس اللى بيفتوا طبعا مش فى النت بس يعنى مثلا فى موقف حصلى قريب بسبب ناس من اللى بيفتوا

كنت ورايا ميعاد مهم فى مدينة نصر فى المهم انا دايما برب من التحرير لمدينة نصر بس فى ناس قالتلى انزل رمسيس احسن واركب من هناك بدل ما اقرب فالمهم نزلت وبسال الناس اركب مدينة نصر منين وكل واحد يدلك على مكان شكل

لدرجة ان فى واحد قالى انت تطلع الكوبرى ده وتمشى لغاية ما تلاقى اول نازلة يمين واسال هناك هيدلوك

المهم انا اتخرت 1/2 ساعة على الميعادبس جت سليمة مع واحد تانى كان ممكن متجيش سليمة

مش عارف هيحصلهم ايه لو قالوا معرفش

ان كان اللى عارف ممكن يوصفلك غلط فما بالك لالى ميعرفش

يعنى انا مره كنت قريب من شارع مصدق وواحده سالتنى على مكان هارديز وصفتلها هارديز اللى فى البطل احمد عبد العزيز ونسيت خالص ان فى هارديز فى شارع مصدق و مفتكرتش غير بعد ما مشيت بربع ساعة رغم انى ساكن فى المنطقة دى وعارف المكان كويس ومع ذلك وصفت غلط فما بالك باللى بيوصف وهو مش عارف حاجة