يوميات مصمم قرفان

يعنى هما كانو ناقصين سبب تانى عشان اكرهم اكتر

يعنى اقعد 4 ايام بصمم استايل جديد وبعد ما اتعب فيه ده كله يحصل كده

عامل اللى اوت 3 عواميد 2 سايد بار وبعد التعب والسهر فى الاخر اوريه لواحد صاحبى المهم صاحبى دهبيعمل بمبدأ الحاجة اللى جاية مع الجهاز هى الاحسن الناس اللى عملوها بيفهموا اكتر منا (بيستخدم الاكسبلورير )يقولى انه بايظ

الموضوع ده خلانى اشك فصطبت  ie4linux والمفاجأة مكنتش على البال التصميم التلت عواميد بقى عامودين  والااتنين سايد بار فوق بعض البلوك اللى فى النص بقى مفلطح والفوتر واخد عرض الشاشة كله

طب انا عاوز افهم ازاى ان كان الفوتر جوه البلوك اللى فى النص ازاى خارج بره حدوده مش فاهم ده طبعا غير الكورنر الشفافة اللى مبقتش شفافة

يعنى ليه احنا نعانى عشان مايكرسوفت مش عاوزة تلتزم بالمقايس

مصطلحات لينوكساوية

فى الموضوع ده شوية مصطلحات من اللى بيسمعها مستخدم اللينكس او مستخدم الكمبيوتر عامة

Cron

هو زى منظم مواعيد للبرامج بيحدد معاد لكل برنامج عشان يشتغل فيه يعنى مثلا انا عاوز برنامج Amarok كل يوم الساعة 7 الصبح فاول ما تيجى الساعة 7 البرنامج يتفتح

Daemon

لا مش اللى جه فى دماغك لو انت من الناس اللى بتتابع افلام الرعب .ال Deamon ده اى برنامج بيشتغل لوحده من غير اى تدخل منك .ممكن يكون مثلا برنامج بيمسح الملفات المؤقته

ملحوظة ال Cron عباره عن Deamon.

Hacker

بسبب الافلام الناس فاكره ان الهاكر هو اللى بيخترق اجهزة الناس التانية الكلام ده مش صحيح اللى بيعمل كده هو ال Cracker. الهاكر تقدر تقول عليه مبرمج محترف والهاكر هو المستوى اللى بيسعى ليه اى مبرمج. وال Cracker برضه يعتبر هاكر لكنه انضم للجانب المظلم.

Kernel

الكرنل هو البرنامج الرئيسى لاى نظام تشغيل .الكرنل هو اللى البرنامج اللى بيتعامل بشكل مباشر مع الهارد وير.

البرامج التانية بتطلب من الكرنل انها تنفذ حاجات فى الكمبيوتر عشان تقدر تنفذها .يعنى مثلا لو برنامج عاوز يكتب حرف على الشاشة البرنامج بيطلب من الكرنل انه يحط الحرف ده على الشاشة يعنى من الاخر كل حاجة بتعدى على الكرنل الاول(بس طبعا لكل قاعدة استثنائات). يعنى الكرنل ده زى الحكومة بتاعت نظام التشغيل.

compiler

هو البرنامج اللى بيحول السورس كود المكتوب بلغة بفهمها الانسان لملفات تنفيذية مكتوبة بلغة يفهمها الكمبيوتر

Open Source

ببساطة هو البرنامج اللى بيجى معاه السورس كود بتاعه عشان تستخدمه وتتعلم منه وتعدله لو حبيت.

process

اى برنامج بيشتغل على الكمبيوتر يعتبر Process.

pid

كل process بيبقى ليها id مختلف عشان ممكن ال process تتشابه.

signal

دى الطريقة اللى البرامج بتكلم بعضها بيها.

لو عجبك الموضوع ده يبقى اكيد هيعجبك ده

وانتظروا قريبا

مصطلحات انترنتية الجزء التانى

يوبونتو رايح جاى

خلاص بعد 15 يوم بعد عن اليوبونتو واستخدام جينتوو رجعت لليوبونتو تانى وحشنى اللون البنى وكم  البرامج الجاهزة  و ان المشاكل اللى بتواجهك مجرد بحث فى جوجل 99% بتلاقى الحل

هو طبعا انا اتعلمت حاجات كتيرة فى الجينتوو كان لا يمكن اتعلمها مع يوبونتو او فيدورا بس بعد مظبتوا زى منا عاوز مبقاش فى اى حاجة اعملها

فعلا  اللى يشرب من سهولة يوبونتو لازم يرجعله تانى

والحمد لله خلصت الامتحانات على خير “من النهاردة مفيش امتحانات انا الامتحانات انا الامتحانات“

يعنى تقريبا بقيت شبه متفرغ للموقع لغاية يوم 24 الشهر ده على الاقل

مصطلحات انترنتية

قررت من يومين انى اكتب موضوع عن ال DNS فلقيت انى بشرح مصطلحات كتير فقررت انى اقلب نشاط الموضوع لحاجة تانية حكتب فى الموضوع ده كام مصطلح من اللى بنسمعهم كتير واشرح معناهم وهبدا بالموضوع اللى كنت حكتب عنه اساسا

• DNS

الDNS دى اختصار ل Domain Name System نقدر نقول عنها زى دليل التليفونات دور ال DNS انه يحول اسم الموقع اللى ساعتك بتكتبه للايبى بتاع الموقع ده

بيعنى لو مثلا كتبت موقع Example.com فى المتصفح بتاعك فاللى بيحصل انه بيحولك على رقم زى ده 208.77.188.166 ايه الاسهل انك تحفظ الرقم ولا تحفظ الاسم

• IP

الرقم اللى اتكلمنا عليه فوق ده اسمه IP وهو اختصار ل Internet Protocol

وده وظيفته انه يوفر لكل جهاز رقم خاص بيه مختلف عن الاجهزة التانية عشان يبقى سهل انى اوصله

• IPV4

ده اصدارة من اصدارات الاى بى عباره عن 32bit او 4byte وده معناه ان اخر سعة ليها 2³² او 4,294,967,296 وده مش رقم كبير وهو اللى ادى لظهور IPV6

• IPV6

ده بقى حل المشكلة اللى فى الاصداره اللى فاتت بانه 128bit يعنى 16byte وده معناه ان سعته ممكن توصل ل 2¹²⁸

ومعتقدش ان المكان يكفى انى اكتب الرقم ده هنا

• Dynamic IP

ده معناه ان ال IP مش ثابت يعنى كل مره تفتح جهازك ليك IP مختلف عن المره اللى قبليها واغلب الناس فى مصر عندهم ال IP Dynamic

• Static IP

وده معناه انك ال IP بتاعك ثابت مش بيتغير(محجوزلك) وده بيبقى مفيد فى حالة السيرفرات عشان مش كل شوية الاى بى يتغير ويبقى لازم تغير الدى ان اس على الاى بى الجديد

وده بيبقى بالطلب والسعر فى مصر تقريبا 10 جنيه على كل اى بى

• DHCP

ال DHCP اختصارDynamic Host Configuration Protocol وده بيبقى مهم جدا عشان يحددلك ال IP لو انت بتستخدم Dynamic IP

• PPP

وده اختصار لPoint-to-Point Protocol وده وظيفته انه يوصل نقطتين ببعض عن طريق اتصال مباشر من خلال وفى الغالب بيستخدم فى توصيل الانترنت لعملاء Dail-Up

• PPPoE

اختصار ل Point to Point Protocol Over Ethernet وده بيوتوصل فى الغالب مع مستخدمى ال ADSL

• DSL

اول حاجة هى اختصار ل Digital Subscriber Line ودى مجموعة من التقنيات اللى بتنقل البيانات بشكل ديجيتال فى خطوط التليفون

• ADSL

أختصار ل Asymmetric Digital Subscriber Line وده اشهر نوع من ال DSL وبيستخدم خطوط التليفون لنقل البيانات بس اسرع بكتير من نظام Dail-Up وبييستخدم الترددات العالية اللى مش بتستخدم فى الاتصالالت الصوتيه عشان ينقل البيانات عشان كده التليفون مش بيبقى مشغول وانت بتستخدمه

• Dail-Up

ده عكس الDSL بيستخدم ترددات الصوت اللى احنا بنسمعها 20Hz : 20KHz فبالتالى متقدرش تتكلم وانت مشغله لانه بيشتغل فى الترددات اللى انت بتتكلم فيها

اكيد فى حاجات نسيتها فلو حد حاسس ان فى حاجة تانية ممكن تكتب او فى حاجة غلط ابعتلى ايميل على mfto7.com@gmail.com

الفيلم المفتوح

Big buck Bunny

تانى فيلم مفتوح بعد فيلم Elephants Dream والمقصود بفيلم مفتوح حاجتين

1-كل البرامج المستخدمة فى عمله برامج مفتوحة المصدر

2-كل التصميمات والملفات المستخدمة فى عمل الفيلم موجودة لتنزيلها عشان تتعلم منها

الفيلم ده زى فيلم Elephant Dream كان الهدف منه اظهار امكانيات برنامج Blender وطبعا البرنامج غنى عن التعريف وهو البرنامج المستخدم فى عمل فيلم Shrek 3

و ان يبقى فيه حاجة تقدر تتعلم منها لو حبيت تعمل مشروع زى ده

الفيلم ظريف ومن الافلام القصيرة

الفيلم رفعته على موقعى بأمتدادين

• avi

• ogg

او ممكن تنزله من الموقع الرسمى

او تتفرج عليه فى YouTube

وهتلاقى الملفات المستخدمة فى عمل الفيلم هنا

graphicall.org

انا عارف ان الموضوع متأخر شوية(3 ايام) بس  كنت مشغول اليومين دول فى الامتحانات(ادعولى)