الرسائل المزعجة: الحل

عمرك فكرت رسايل الاعلانات اللى ماليه الميل بتاعك دى بتيجى منين ولا المنتديات اللى بتبعلتلك رسايل عشان تسجل عندها بتعرف الميل بتاعك منين

انا اقولك

مش ساعات كتيره جدا بيحصلك  مشكله او بتحتاج حاجة فاول حاجة بتفكر فيها انك تدور فى جوجل وطبعا معاك حق لانك دايما بتلاقى اللى انت عاوزه بس المشكله انك مش بتلاقى الحل غير فى موقع من بتوع (المحتوى مخفى سجل لمشاهدته) وطبعا بحسن نيه بتسجل فى الموقع بالايميل بتاعك وبس كده انت وقعت فى الفخ

لان بيحصل حاجة من الاتنين

1. صاحب الموقع يبيع لستة الايميلات بتاعت الناس اللى سجلوا عنده لاى شركه اعلانات او اى صاحب موقع

2. هاكر يستخدم بوت عشان ينسخ كل الايميلات اللى فى قايمة الاعضاء اللى فى موقع من المواقع

طب وايه الحل؟

بص احسن حاجة انك تعمل بمبدأ الوقاية افضل من العلاج

يعنى ايه ما اسجلش فى مواقع تانى؟

لا انا مقلتش كده انا قصدى ما تسجلش بالمايل بتاعك

ما هما ساعات بيطلبوا انى ادوس على الرابط اللى حيجيلى فى رسالة!

بسيطة يا سيدى الحل فى

بص يا سيدى الموقع ده بيديلك ايميل وهمى تاخد عليه الرسايل اللى انت عاوزها وبعد ربع ساعة يتمسح الميل كانه مش موجود وبيديك الايميل ده بمجرد ضغطه زرار كل اللى عليك انك تدوس على

Get-temporary-e-mail

وخلاص كده حيديك ايميل تستخدمه فى التسجيل فى اى موقع

وبعد ربع ساعة اكن ما فيش اى حاجة خالص

ازاى تقدر تشغل الفايروسات فى اللينكس

بجد حاجة ممله ان مستخدمى الويندوز عندهم كل الفايروسات. بجد مش المفروض الناس اللى بتستخدم اللينكس يستمتعوا بالموضوع ده هما كمان

بفضل الناس اللى عمله برنامج Wine دلوقتى مستخدمى اللينكس فى كل مكان يقدروا أخيرا يشغلوا الفايروسات (تقريبا…) .

المشكلة ان اللينكس مش من السهل انك تشغل عليه الفيروس زى الويندوز.لازم تدور على الفايروسات وتشغلها بنفسك يعنى مش بتشتغل لوحدها زى الويندوز .

لازم المطورين بتوع اللينكس يركزوا على الموضوع ده. لان لازم تشغيل الفايروسات يبقى اسهل من كده.

انا اعرف ناس بتجمع الفايروسات بس ما حبتش ازعجهم ,لقيت حبة مش بطالين بعد البحث فى رسايل السبام اللى بتجيلى.جبت نسخة من برنامجClamAV, قدرت اجمع نص دستة فايروسات “مش بتشتغل غير فى الويندوز” بس موضوع مش بتشتغل ده قرب يتغير

Klez

بعد شوية مجهود Klez اشتغل , بس Wine فضل يطلع رسايل ايرور عن ملف “ntdll.” دورت فى جوجل عشان اعرف الفايرس ده بيعمل ايه بالظبت , اكتشفت انه بيدور فى السيستم بتاعك جوه ملفات التكست, ولو لقى اى ميل يبعت نفسه للميل ده قلت لازم اجرب فحطيت الميل بتاعى فى ملف .txt فى الفولدر

  ~/.wine/fake_windows/Windows/Desktop/

واستنيت عشر دقايق بس مفيش اى حاجة جت قلت اروح ابص فى كتاب الفيزيا شوية و أراجع على chapter2 لان الامتحان بكره

المهم فات نص ساعة ومفيش اى حاجة قلت جايز فى مشكله فى ارسال البيانات فى برنامج wine فنزلت نسخة من برنامج putty وأشتغل عادى

بيتهيقلى Klez يستحق 2/5هو يمكن معملش اللى المفروض يعمله بس على الاقل اشتغل

MyDoom

الفايرس ده مشتغلش اساسا فتقيمه 0/5

Sobig

الورم دى اشتغلت . المفروض انها بتعمل ملف اسمه winstt32.dat وبعد عمل بحث عن الملف ده فى فولدر fake_windowsملقتش الملف ده وبرضه مبعتش نفسه على الميل

التقيم 2/5

SCO worm

الفايرس ده المفروض انه تعديل على My Doom

المره دى مشتغلش بس لا ده كمان حط الملف اللى كان المفروض يحطه فى الفولدر

 ~/.wine/fake_windows/Windows/System/shimgapi.dll

بس للاسف معملش اى حاجة تانية وقفل”تقريبا الواحد لازم يبقى عنده ويندوز عشان يستعمل الحاجات الممتعة دى

بيتهيقلى ان اللى عدل MyDoom بالشكل ده كان حاطط فى دماغة انه يخليه متوافق مع اللينكس

التقيم 3/5 على الأقل أشتغل

SomeFool

الفايروس ده قدر انه يحط الملف winlogon.exe فى الفولدر بتاع wine وغير كده علق فى infinte loop خلت الجهاز بطئ جدا طبعا اول ما دوست ctrl+c اتقفل بس على الاقل عملنص اللى كان المفروض يعمله

التقيم:4/5

استنتاج

من الخمس فيروسات اللى جربتهم ولا واحد قدر يبعت نفسه او ينسخ نفسه.

الواحد لازم ينحنى لفايروس SomeFool لانه قدر يبطئبس لو ده الضرر الوحيد من تشغيل فايروسات الويندوز فى wine يبقى من الواضح ان مطوروا wine لازم يعملوا مجهود اكبر عشان يخلوا الحاجات دى تشتغل عندنا احنا كمان

	Klez	MyDoom	Sobig	SCO	SomeFool
اشتغل اساسا	شغال	مش شغال	شغال	شغال	شغال
حط ملفاته	مش شغال	مش شغال	مش شغال	شغال	شغال
نسخ نفسه	مش شغال	مش شغال	مش شغال	مش شغال	مش شغال
اثر على النظام	مش شغال	مش شغال	مش شغال	مش شغال	شغال
التقيم	2/5	0/5	2/5	3/5	4

ملاحيظ

• عشان اقدر أشغل الفايروسات دى فى برنامج wine اضطريت انى اعدل فى ملفات الكونفج بتاعته يعنى انت فى أمان متقلقش
• لو حبيت تجرب وشغلت فايرس بس بطئلك الجهاز او عمل اى حاجة كل اللى حتحتاج انك تعمله انك تدوس ctrl+c عشان تقفل wine تمسح الفولدر بتاعه fake_windows
• لو مكسل تمسح الفولدر او مش لاقيه (اصله مخفى) امسحwine وصطبه تانى فى 5 دقايق بالظبط
• بسبب نظام الصلاحيات فى نظام اللينكس الفايروس مش هيقدر يتحكم فى جهازك الفايروس مش هيقدر يشوف اى حاجة غير ملف الهوم بتاعك
• لو مش عاوزه يشوف ملف الهوم بتاعك اعمل ل wine يوزر خاص بحيث لو اشتغل مش هيعمل اى حاجة وهيستناك تقفله
  
• فى اللينكس الفايروسات متقدرش تخلى نفسها تبدأ مع نظام التشغيل على عكس الويندوز

وزى ما قولت قبل كده لازم مطوروا برنامج wine يشتغلوا احسن من كده عشان يدعموا الفايروسات دى لان احنا كده معنداش دعم فايروسات وصحابى بيغيظونى بالموضوع ده (احنا جهزنا بيشغل فايروسات وانت لأ)

سلام بقى عشان الحق الامتحان

اللينكس للجميع

• ايه اللينكس ده

اللينكس ده نظام تشغيل

• يعنى ايه نظام تشغيل؟

بص ببساطة حاجة زى الويندوز

طب مانا عندى الويندوز استعمل اللينكس ليه؟

هقولك يا سيدى

1. مفتوح
2. بلوشى
3. ليه تستخدم برامج مش مرخصه لو ممكن تاخدها ببلا
4. انسى الفايروسات
5. مش هتضر تصطبه كل اسبوعين
6. السرعة مش بتتناسب عكسيا مع الزمن
7. ااوعى تنسف حمامك القديم
8. لو عندك play station3 ما تصطب عليه لينكس
9. اتحكم فى كل حاجة
10. سهل لو عاوزه يبقى سهل
11. بقية الحاجات فى يوم تانى عشان عاوز انام

1-مفتوح

• ايه مفتوح ده انت بتعمل دعايه لموقعك ولا ايه؟

انا قصدى بمفتوح انه مفتوح المصدر وده برضه سبب تسمية الموقع المهم معنى كلمه مفتوح المصدر انك ممكن تبص فى الكود بتاعه وتتعلم منه وتعدل عليه وتطوره ومحدش حيكلمك فى انظمة تانية حتى لو اشترتها مجرد محاوله انك تغير فيها حاجة ضد القانون ولو مش مصدقنى اقرا اتفاقية المستخدم
يعنى من الاخر حرية

2-بلوشى

• ماشى انت بتقول انه مجانى يعنى انت بتشوف حد فى مصر بيدفع تمن حاجة؟

اه انا معاك انك ممكن تجيب اسطوانه ويندوز من على الناصية بخمسة جنيه بس دى تعتبر نسخة مسروقة لو حتقبلها على نفسك انا مقبلهاش
وكمان لو اتقفشت بيها حتتظبت وانتوا عارفين التظبيت فى البلد دى عامل ازاى

3-ليه تستخدم حاجات مش مرخصة(مسروقة) لو ممكن تاخدها ببلاش ومتبقاش مسروقة

• قصدك ايه؟

عارف البرامج الى انت بتجيبها مسروقة دى فى برامج مجانيه بتقوم بنفس الوظيفة تقريبا وساعات بتقوم بيها احسن والدليل على كده برنامج firefox

• يعنى الناس دى بتكسب منين ؟

متقلقش انت عليهم هما بيشتغلوا بس هو انت لازم تدخل الفلوس فى كل حاجة يا عم بيشتغلوا متطوعين

• يعنى انت هتقارن واحد متطوع بواحد بيقبد 5000 جنيه ؟

اه عشان تبقى عارف الواحد بيطلع احسن حاجة عنده لما يكون بيعمل الحاجة دى عشان عاوز يعملها مش عشان يقبض منها قرشين
اوعى تقولى ان الانترنت اكسبلورر و الناس اللى عامله بتقبض فلوس كتير احسن من الفاير فوكس اللى مبنى على جهد تطوعى
ملحوظة
اينشتاين كان متطوع

3-انسى الفايروسات

بص يا سيدى عدد الفايروسات اللى فى نظام اللينكس قليل جدا واكبر حاجة ممكن يعملوها انهم يبطئوا الجهاز ومجرد ما ترستر الجهاز يبقى الفايروس راح لان النظام شغال بنظام التصاريح

وغير كده امن من الاختراق عن انظمة ميكروزفت

بس انا بتكلم عن جهازك انت يعنى الجهاز اللى عندك فى البيت

السيرفرات دى موال تانى وخصوصا لو انت على استضافة مشتركه

فى حاجات لازم تعملها للتأمين لان بيبقى عليهالحاجات دى معروضة للناس كلها على الويب عن طريق سيرفر الاباتشاى بيبقى ليه يوزر ليه تصريح دخول فى كل حته فلو واحد من العملا قدر يوصل لليوز ده ممكن يخش على النظام كله ويعمل اللى هو عاوزه

ومن الواضح ان صاحب السيرفر اللى انا مستضيف الموقع ده عليه ميعرفش اى حاجة عن الحماية لانه اساسا عامل الاباتشى من غير يوزر واى حد ممكن يخش على ملفات كل الناس وغباء بعيد عنك

ممكن اى حد من العملاء بتوع الراجل ده يوقعله السيرفر فى 5 دقايق

دلوقتى اى حد ما يعرفش اى حاجة فى اى حتة بيشترى فى بى اس ويبيع استضافات

بس الشهر اللى دفعته ده يعدى على خير وانا احول على شركة تانية على طول او اشترى فى بى اس واآمنه بنفسى

4-مش هتضر تصطبه كل اسبوعين

بسبب نفس الاسباب اللى فوق
يمكن يكون السبب الوحيد اللى يخليك تصطبه انك تكون بتحب تجرب انظمة تشغيل جديده
انا فى الفترة اللى فاتت جربت 17 توزيعة لينكس و 3 بى اس دى و osx و solaris
واستقريت اخيرا على يويونتو لينكس (حتجنن بقالى 5 شهور مجربتش حاجة جديدة)

5-السرعة مش بتتناسب عكسيا مع الزمن

فى الويندوز كل ما تفتح جهازك اكتر كل ما يبقى ابطأ لكن فى اللينكس النظام مش كده وانا حتكلم ان شاء الله عن الموضوع ده بالتفصيل فى موضوع منفصل

6- اوعى تنسف حمامك القديم

عندك جهاز قديم شوية هات نسخة لينكس خفيفة وخليه يرجع يعيش تانى
لكن لو الجهاز من ايام الجنيه الخشب ممكن تصطب عليه لينكس من غير واجهة رسومية وتحوله راوتر او فاير وال

7-لو عندك play station3 ما تصطب عليه لينكس

ايوه انتى سمعتنى صح صطبه على بلاى ستاشن ثرى عادى هو انا مش قولتلك انه بيتصطب على كل حاجة

• طب ليه هو انا جهازى وحش

قارن جهازك بالبلاى ستاشن ثرى

كفايه البروسيسور بتاعه
بروسيسور البلاى ستاشن 3 بمقام 8 بروسيسور
و 3.2GHz
ملحوظة بس هو بيتعرف على الهارد وير بتاع البلاى ستاشن كله حتى الجوى ستيك ال 6-axis وقارى اسطوانات البلو راى
وفى ناس بتقلك مش بيتعرف على حاجة

8-اتحكم فى كل حاجة

اللينكس بيديك تحكم فى كل حاجة ومش فى الشكل بس
رغم ان موضوع الشكل ده فيه مرونه كبيره جدا لكن ده ميمنعش ان المرونه دى فى كل حاجة
لان مفيش حاجة المستخدم المتقدم ما يقدرش يفيرها القضية كلها انه يعرف يغيرها منين
والباقى كله بيبقى تعديل فى ملف نصى

9-سهل لو عاوزه يبقى سهل

الموضوع مش موضوع سهولة وصعوبه الموضوع موضوع تعود يعنى لو فى حد اول مره يستخدم الكمبيوتر استخدم لينكس وفض يستخدمه فتره وبعد كده اديتله جهاز ويندوز هيقولك ده صعب قوى
والعكس صحيح

تانى حاجة الموضوع موضوع نفسى
يعنى لو حاجة سهلة وانت حاسس انها صعبة حتبقى صعبة جدا
ولو حاجة صعبة بس انت حاسس انها سهلة حتبقى سهلة جدا
والدليل فى الموضوع ده فى الدراسة يعنى مثلا انا
فى سنه اولى كنت بعتبر الميكانيكا سهلة جدا رغم ان صحابى كانو بيعتبروها صعبة فبالتالى هى سهلة بالنسبة لى
وكنت بعتبر الكيميا صعبة رغم ان كل صحابى كانو بيقولوا انها سهلة فبالتالى بقت صعبة بالنسبة لي
عشان كده حاول انك ما تحكمش ان الحاجة صعبة قبل ما تجربها لانك مجرد انك حطيت فى دماغك انها صعبة بقت صعبة

على العموم انا وظيفتى هنا انى اوريك انه سهل
فى المواضيع الجايه ان شاء الله

10-بقية الحاجات فى يوم تانى عشان عاوز انام

الجواب باين من عنوانه انا عاوز انام عشان فصلت خلاص
ومش قادر افكر

20 حاجة بنتعلمها من الافلام الأمريكية

هما مش عشرين بالظبت بس رقم 17 رخم ومحدش بيعد

• لو فى اتنين توأم لازم على الأقل واحد منهم يكون شرير.

• لو قررت انك توقف عمل قنبلة متقلقش تختار انى سلك عشان تقطعه لانك دايما هتقطع السلك المظبوت.

• اى جهاز لابتوب يقدر يخترق السيستم بتاع سفينة فضاء.

• لوفى ناس كتير اتلموا عليك عشان يضربوك متقلقش هيحاربوك واحد واحد وبقية الناسحيفضلوا يلفو حوليكم لغاية ما تخلص على اللى قصادك بعد كده يخش اللى بعده

• لو طفيت النور عشان تنام كل حاجة بتبقى باينه بس غامقة شوية

• بدل ما يخلصوا الرصاص الاشرار دايما بيفضلوا يقتلوا البطل بطرق معقدة فيها بكر والات عد وفران وسمك قرش مفترس عشان يدوا للبطل عشرين دقيقة يهرب فيهم.

• اى حد يقدر يهبط بطيارة طول ما فى حد فى برج المراقبة بيقوله يعمل ايه

• هتقدر تعيش فى اى حرب ما دمت مش حاطت صورة عيلتك قدامك فى الطيارة … الدبابة…العربية …الخ

• قدر تشوف برج ايفل من اى حته فى باريس

• مش حتحس باى الم وانته بتضرب لكن لما يكون حد بيداويلك الجروح حتتالم جامد اوى

• لو فى لوح ازاز كبير ظهر لازم يتكسر بعديها بخمس دقايق

• تقدر تخرق السى اى ايه فى خمس دقايق بانك تخمن الباسورد

• حتى لو بتسوق فى طريق مستقيم لازم كل شوية تلف الدريكسيون (فاكرين ايام انور مجدى)

• القنابل بيبقى فيها تايمر يحددلك حتنفجر كمان قد ايه

• لو قررت انك ترقص فى الشارع اى حد حتقابله بيبقى عارف الرقصة دى بتترقص ازاى

• كل شرطى بيخضع لاختبار نفسى عشان يتحط مع شريك يكون عكسه فى كل حاجة

• لما يكونوا لوحدهم الروس بيفضلو يتكلموا انجليزى
  

10 حاجات تعملها عشان تتعلم لغة برمجة جديدة

ساعات بنحب نتعلم لغة برمجة جديدة جايز للتسلية او للدراسة او للشغل وطبعا الطبيعى انك تقرا كتاب 700 صفحة عشان تعرف تتعامل مع اللغة بس الكلام ده كان زمان دلوقتى فى طريقة احسن وهى انك تجيب cheat sheet فيها ال Syntax بتاع اللغة اللى عاوز تتعلمها وتعمل اللى هقولك عليه

انت دلوقتى قدامك ال cheat sheet وطبعا معاك كومبيلر او IDE للغة اول حاجة هنعملها اننا نعمل برنامج بسيط زى Hello World مثلا عشان بس ناخد على اللغة وبعد كده هنعمل شوية برامج

1. برنامج بيتطبع على الشاشة الارقام من 1 ل n
2. برنامج بيعمل متسلسلة فيبوناتشى 13.8.5.3.2.1…..n
   
3. برنام ياخد مجموعة من الارقام من اليوزر ويرتبهم من الكبير للصغير
4. برنامج بيحسب تركيز الالكترونات فى اشباه الموصلاتn=(2*pie*m*k*T/h^(2))^(3/2) *exp(-Eg/(2kT)
   pie:3.14159
   m:mass of electron
   k:boltzman constant
   T:temp.
   h:plank constant
   Eg:Eneargy gap
   ولو الناتج طلع 1.4*10^10 يكتب ان نوعه سيليكون
5. عدل البرنامج اللى فوق بحيث تسأل المستخدم ان كان عاوز يكرره ولا لأ
6. آله حاسبة بتعمل عمليات الجمع والطرح والضرب والقسمة والجزور وترفع لأس معين والدوال المثلثية والمضروب والمعكوس والمقياس
7. نفس البرنامج اللى فوق بيطلع الناتج فى اكثر من فورمات يعنى مثلا كام خانة بعد وقبل العلا والحاجات دى
8. برنامج بياخد التاريخ ويحوله لاكثر من شكل yy-mm-dd ل -dd-yy-mm
9. برنامج ياخد ملف اتش تى ام ال فيه جدول ويشيل كل الوسوم ويحط بين كل عمود وعمود “:” وبين كل صف و صف “,”
10. برنامج بيشيل ويحط حاجات من اول او اخر ال Array

كده تبقى انت خدت على اللغة نفس البرامج اللى كنت بتعملها بالغات التانية حاول تعملها بالغة دى بما انك خلاص فهمت تستخدمها ازاى

خريطة الكابلات البحرية

فاكرين كابل النت اللى اتقطع عندنا  فى مصر وعمل مشاكل جامده

انا حبيت اعرف مكان الكابل ده فدورت لكن للاسف ملقتوش لوحده لقيت خريطة بكل كابلات الانترنت فى العالم و كابل الاسكندرية اللى اتقطع مرسوم بالاسود

متقسمه حسب سرعتها فقلت اشاركها

دوس على الصورة عشان تشوفها بالحجم الطبيعى

الشيل مش بيشل الجزء 1-1

ما هو الشيل؟

ببساطة الشيل هو البرنامج اللى بياخد الاوامر من الكيبورد ويديها لنظام التشغيل. زمان ايام الجنيه الخشب كان الشيل الطريقة الوحيدة للتعامل مع الكمبيوتر .
اما دلوقتى عندنا الواجهة الرسومية وواجهة سطر الاوامر.
فى اغلب توزيعات اللينكس الشيل هو برنامج اسمه Bash لكن ده ميمنعش وجود انواع اخرى من الشيل زى kshو tcsh و zsh الدروس فى الموضوع ده معموله على Bash بس ده ميمنعش ممكن تشتغل مع معظم الباقى

هو ده الشيل امال ايه xtermو gnome-terminalو konsole؟
دول يا عم برامج اسمها ترمانل بتحطلك نافذة تقدر تتعامل فيها مع الشيل
ممكن تلاقى فى توزيعة لينكس واحده اكتر من تيرمنال xtermو rxvt و konsoleو kvt و وgnome-terminalو nxtermو eterm.

طب ازاى اشغل الترمنال؟
دور فى قوائم البرامج على اى حاجة زى terminal اوconsole
بص من الاخر انت فى الغالب هتكون كي دى اى او جنوم لو جنوم يبقى دور عل terminal لو كى دى اي دور على konsole

بس كده فتحته و الحمد لله تعالى عاوز اجربه؟
بص يا عم بعد ما تفتح الشيل هتلاقى حاجة زى كده

كود:

[ahmad@localhost ahmad]$

طبعا بدل احمد هيبقى اسم اليوزر بتاعك
ظهرلك حاجةزى كده او حاجة قريبة من كده
قشطة اكتب اى هبل فى الجبل حروف ما لهاش معنى اى حاجة
مثلا

كود:

[ahmad@linuxbox ahmad]$ kdkjflajfks

لو الحكاية مشيت تمام هتشوف رسالة الايرور دى

كود:

bash: kdkjflajfks: command not found

يعنى انت مخلينى اعمل كده عشان تقولى حتطلعلك رسالة ايرور حسبى الله ونعم الوكيل
اصبر عليا بس انا جايلك فى الكلام
دوس بقى زرار السهم لفوق

ايه ده ده اللى انا لسة كاتبه اه و النعمه هو اللى انا لسة كاتبه ! وطبعا لو كنت كاتب حاجات تانية قبل كده اقعد دوس نفس الزرار لغاية ما تلاقيها

طب جرب تدوس سهم يمين وشمال

ايه ده ده انا بمشى فى شوية الهبل اللى كنت كاتبه! وممكن امسح حرف او اعدله او ازود حرف نسيته وهكذا

طيب هقولك نصيحة مهمة قبل ما اكمل اوعا تستخدم سطر الاوامركمستخدم رووت الا فى الضرورة القسوى يعنى حاجة ميقدرش يعملها غير مستخدم رووت لانك ممكن تبوظ حاجة

ايه ده انت خدتنى فى دوكة يعنى ايه مستخدم رووت ؟

بص يا عم فى انظمة اليونكس كل يوزر بيبقى ليه صلاحيات يعنى مثلا اليوزر الفلانى مالوش غير اناه يقرا الملفات اللى فى الفولدر ده اليوزر ده ممكن يعدل فى الملفات ويقراها واليوزر ده ليه نت وده مالوش وده يقدر يخش على فولدرات الهوم بتاعة بس ويعدل فيها زىماهو عاوز

الحاجات دى بقى يا معلم ما تمشيش مع الرووت الرووت ده يقدر يعمل اى حاجة فى اي حتة يقدر يمسح ملفاته وملفات غيره ويمسح يوزر مش عاجبه ويعمل يوزر جديد ويحرق الجهاز بجاز يعنى لو عاوز يمسح كل ملفات النظام محدش هيقدر يكلمه عشان كده ما تستخدموش غير فى الضرورة

اه طب كويس انك نبهتنى قولتلى بقى ازاى بقى بخش كمستخدم رووت؟
انا لسة مقلتلكش ومش حقولك دلوقتى حقولك لما يجى وقتها ومتخفش قريب اوى هقولك


ايه ده هوكله كيبورد كيبورد مفيش ماوس ولا ايه اصلى بصراحة بتدايق لما ما استخدموش؟
رغم ان الشيل واجهة سطر اوامربس ممكن تستخدم فيها الماوس ابسط يا عم
هيههههه
لا متتبسطش او كده دا هو تعمل اسكرول لفوق او لتحت عشان تشوف الحاجات القديمة
او لو انت فوق تنزل تحت
اوتعمل كوبى وباست بالماوس بس

ملاحيظ 

الماوس بتستخدمه فى التيرمنال بس لكن لو واجه سطر اوامر بالكامل ففى الغالب مش هتستخدمه

الشيل ده اداه مفيده جدا بس ممكن واننا بتستخدم اللينكس متشوفهونى مش لازم تتعلمه عشان تفهم اللينكس

يمكن كل الكلام اللى فى الدرس ده يعتبر مالوش لازمه بس دى مجرد مقدمه

الموضوع اسهل مما تتصور بس  فى ناس بتسترخمه مش عارف ليه

الكلام ده يمكن انت مش محتاجة لكن اليوزر المتقدم او حتى واحد عنده فى بى اس بيحتاجه قوى

 

الموقع الجديد